أعزائي القراء والمتابعين , الله يساعدكم على أيام الحر وطلايب الصيف , طبعا في الماضي , يعني بأيّامنا هم كان أكو حر شديد , بس  تراب ماكو , وكان المقهى فيه مبردة , وأحيانا يروح بعض الأدباء والمثقفين من المقهى إلى صالات السينما المكيّفة المبرّدة , هم يشوفون فيلما جديدا , وهم يرتاحون بالتبريد ويمكن البعض من التعبانين منهم ينام شويّة , هسه هاي هم راحت عليكم أعزائي القراء , المهم اليوم راح أسولف إلكم سالفة يجوز راح تقولون أنت شدخلك بهاي المسائل , إنت چايچي على قد حالك , وراح أقول ميخالف , بس آني من كثر ما لاحظت القضية صارت عندي معلومات عنها , وهاي القضية هي قصيدة النثر , طبعا راح تقولون أوهوه , وإنت شنو ؟ وراح أقول بس على كيفكم وياي وانطوني عطوه خلي أكمل كلامي , لأن آني صحيح هاي الشغلة بعيدة عني , وما تعنيني لا من قريب ولا من بعيد , بس لو كنتم مكاني كان أيضا تحمستم لها مثل حماسي , راح تقولون شلون وليش ؟ هاه , راح أخبركم ليش , أولا أن شغلة قصيدة النثر تاكل وتشرب مع ذولة الجماعة اللي كانوا خابصين الدنيه شگالت قصيدة النثر وشحطّت قصيدة النثر , ومرة سألت واحدا منهم قلت له شنو قضية النثر هاي , فضحك وقال , أولا هي مو قضية مثل ممتصور , وهي قصائدة ضربت كل القوانين السابقة للشعر بالقاضية , فقلت ُ له ببراءة وحزن : ليش عمي شبيه الشعر , أشو آني أحب الشعر وحافظ هواي أبيات أبو ذية , ضحك أيضا قال عمي اليوم القصة مو مثل متتصوّر , اليوم أكو مواجهة بيننا وبين القدماء , ولازم نحقق النصر , وآني من صارت نصر وهزيمة وقديم گلت خلي أعوفهم , لا توصل وياي للصدگ وياخذوني للجيش الشعبي والله يستر , المهم الجماعة ظلوا مشغولين بيهه هاي قصيدة النثر , ومرة دخل للمقهى شاعر أعرفه وهو سمين وشوية كبير بالسن ويحبني ويحترمني فقلت له بخجل وأدب : أستاذ هم تعرف شي عن قصيدة النثر , فشعرت ُ بأنه فزّ ورمقني بنظرة غريبة , ثم ضحك بصوت عال ٍ وقال لي : حتى أنت أبا جبار وصلوك لمرحلة قصيدة النثر ؟ فقلت ُ له لا أستاذ لتفهمني غلط , آني خو ما أكتب شعر مثلكم . بس شفت الجماعة الشباب اللي يگعدون هناك بس يسولفون بيهه , وشرحلي واحد منهم القضية أشو زادت عليّ تعقيد , فضحك وقال لي , أبو جبار ما عليك بهاي السوالف أما قصيدة النثر اللي يحچون عنها فمينرادلهه شي حتى إنت تگدر تكتبها , يعني كم جملة تسرقها من شاعر مترجم للعربية وكم جملة غامضة وتقول قصيدة نثر , طبعا آني فرحت كلّش من گال حتى إنت تكتبهه , لأن آني أحب أكتب شي , ولو آني ما خلّصت الابتدائية بس شكو بيهه , وبعد أن فكرت , سألت نصيّف الناصري عن الشعراء الأجانب ودواوينهم المترجمة , فضحك نصيّف من قلبه وقال لي بمرح شديد : أي أبو جبار , أنت هم اشتر دواوين جديدة وصير مثلنا شاعر قصيدة نثر ..شينرادلهه !!   

أبو جبار