يكتبها : أبو مطاع

* قدرة شرائية محترمة للمواطن !

ظاهرة المولات , أو الأسواق الشاملة المتنوعة انتشرت في بغداد وفي محافظات العراق بكثرة وبشكل ملفت للنظر , وهي ظاهرة شهدناها في الدول المجاورة التي قدّر لنا أن نزورها , وتذكّرنا بهذه المولات أيام زمان , حين كان العراق مستقرا وفيه أسواق جميلة متنوعة مثل أورزدي باگ الذي كان من المولات المبكرة في المنطقة والذي تحوّل من مول كبير أو سوق كبير , إلى محلات صغيرة في الثمانينات , ثم صار مخازن بائسة , وبعدها تحوّل إلى جدران ومأوى للجرذان والقطط , ثم حائط للشعارات , وهو الآن مهمل , رغم موقعه الحساس , الذي يقع في قلب بغداد , يعني مثل هذا المكان المفروض يعود الآن كأعرق مول في المنطقة , بس منو يقره منو يكتب ؟

* قدرات عجيبة جدا !

واحد , رجل كبير السن , أنيق دائما , يرتدي البدلة وربطة العنق والحذاء اللماع المصبوغ دائما , رغم أنه لا يمتلك سيارة خاصة , ولا قدرة لديه على ركوب سيارات التاكسي , ورغم التراب والحَر , وانعدام الخدمات في الشوارع , إلا أنه يحمل منديلا , مثل الخاولي يمسح العرق والتراب , وإذا سأله أحد فضولي : يابه شعندك لابس قاط بهذا الحر والتراب والازعاج الدائم , راح يجيب بعصبية : إنته شعليك آني عندي وضعي الخاص , وآني رجل معروف من كل المسؤولين , وكل رؤوساء الجمهورية والوزراء أصدقائي من نوري السعيد إلى اليوم , وهسه نصف الوزراء أصدقائي وتلاميذي , بله شافني واحد منهم صدفة بالشارع , شراح يگول علي إذا ما شافني لابس قاط ورباط ومزيّن لحيتي ؟ وما أدري , يا وزير يشوف هذا المسكين صدفة بالشارع ؟ المهم هو يرى الأمور بهذا الشكل ..هنياله !!

*ضرب الفساد ..صدك كذب ؟

كلش تعودنا , أو كولش تعودنا , على أن نسمع تصريحات رنانة وعاصفة وقوية تريد ضرب الفساد في العراق , وننتظر ونكول يا الله , راح ينضرب الفساد ونخلص , ويجي يوم وثاني , وثالث , وننتظر , وبعدين تطلع طلايب وتشغل المسؤولين عن ضرب الفساد , لأن أكو أولويات بالموضوع , وعود بعدين ضرب الفساد , إللي صار مفردة تلمع وتتوهج في قاموس بغداد للتصريحات النارية اللي تخدرنا وتقدملنه مخدرات فعلها أقوى من المخدرات اللي جاي تفتك بهواي شباب عاطلين عن العمل وفاقدين الأمل , واحنه ننتظر , ونشوف شلون راح ينضرب الفساد ومنو أول واحد ينضرب , لأن هم مو مخفيين مبينين وواضحين بس نريد واحد أخو أخيته يوكف بوجوههم    

* بالقوة !

المبدع الرائع فارس حرام  يقول : أعرف أنه ليس "دكتور"... ويعرف أنني أعرف انه ليس "دكتور"... أهله يعرفون أنه ليس "دكتور".. وأصدقاؤنا نساءً ورجالاً كلهم يعرفون أنه ليس "دكتور".. وهو يعرف أننا جميعاً نعرف أنه ليس "دكتور"..مع هذا يصرّ على أن يصف نفسه بـ"دكتور".

* كلاوجية

المجتمع العراقي مبتلي بهواي جهلاء, وكلاوجية ,  وهذولة الجهلاء والكلاوجية طبعا يحاولون يخربون كل شي زين ,...لا ...لا ...مو آسيا , يعني كل شي بيه خير , وأساليبهم عجيبه غريبة , لأن بعضهم كلش مقنعين , ومن النماذج اللي توديك للشط وترجعك عطشان , وهاي الفترة تشهد من هذولة  عدد كبير , لأسباب عديدة أولها ان الشغلة تايهة وهوسة , وأكو خلط واختلاط بالأوراق , لذلك ومن طبقنا مثل ما تعرف حماهه من رجلهه , صارت كلش واضحة شغلة التيهان , وآخر ما توصل إليه الكلاوجية , هو اللبس الجميل , والأسلوب المعدل , ويجيك ويكلك , يابه تره ناسي محفظتي بالبيت وتفاجأت وأنت طبعا , خجلان , وما بجيبك غير عشرة آلاف دينار تنطيهه إله وأنت تعتذر عن التقصير , ومن يروح من يمك تكول , ها آني شسويت , وتروح مشي لبيتكم , وانت غارق في غيمة حيرة وتساؤل ,وشلون صادوني وآني النجر !؟

* تساؤل

ومن صفحة المبدع شوقي كريم حسن نقتطف ماجاء به " سؤال بسيط ؟ لماذا لم تجيش السعودية جيوشها لتقف مع العراق وهو يحارب داعش وجيشت كل هذه الاقوام لتقف ضد مااسمته التمدد الحوثي... هل يعقل ان يكون الحوثيون اخطر من الدواعش؟!!