قراءنا الاعزاء نتمنى أن تكونوا بخير وعافية وسلامة , والله يجنبكم كل مكروه بهذا العالم المليان بالأحداث , أشو مدري شصار بالدنيه , صارت أحداث وطلايب ومشاكل دولية , والعراق صار بنص المعمعة , المهم خلونه وياكم وويه اللي اختاريناه اليوم حتى نشوية نغير جو , وأول قفشة أخذناها من مبدعنا الرائع الدكتور  حسين القاصد اللي يكول بيهه : افاد مصدر مسؤول رفض الكشف عن اسمه ( خاف يتبلل ) بأن أن أحد القادة السياسيين  قرر الانسحاب لعدم امتلاكه يداً من حديد .. على صعيد متصل ، أكد مراقبون للوضع في البلد ، ان مجلس القضاء الاعلى قرر استدعاء كافة امناء بغداد منذ عام 2003 حتى الآن ، كما افادت الانباء بأن لجنة تدقيقية اخذت على عاتقها فتح ملفات مبالغ التعويض التي استلمها المدراء العامون ورؤساء الاقسام بأوراق مزورة وباتفاق مع عوائل لم تتعرض بيوتها للغرق .. ومن بين الاجراءات المتوقع اتخاذها هو اعفاء كافة المدراء والمسؤولين في الامانة من مناصبهم واحالتهم الى التحقيق وفق ( من اين لك هذا ) وكيف سرقته ومن سكت وتستر عليك ..ملاحظة   الخبر مجرد احلام لن تتحقق ابدا !!

والله خوش أحلام لو تتحقق شوية منها على الأقل ..

أما القفشة الثانية فنلتقطها من مبدعنا الرائع علي وجيه اللي يكول بيهه : تره كلش عادي، شارع فتت بيه العصر، وصارت عندي طلعة قبل ساعة، كَلت "شين التعرفه احسن من زين التعرفه"، فتت بيه من جديد، واذا بالميْ يدخل لي من اربع جهات لداخل السيّارة، هاي وين؟ بزيّونة، زيّونة الارستقراطية، زيّونة اللي لكَيت بيها جكسارة وبرادو طافيات وهنّ جنهن بيوت مو سيارات، زيونة يعني مو العبيدي، مو حي التنك المساكين، وتخيّلوا اني طول الطريق ادوس الكلج مال البانزين وجنّي كَاعد ببانيو.. بشرفي من كَد ما صرت عصبي كَمت اضحك، خصوصاً واني احاول اقلل منسوب المي الصعد قريب الكشن الكَاعد عليه..

طبعا احنه ما راح نعلق على هاي القفشات اللماحة الذكية اللي تعبر عن هواي أمور , وتخلي اليد على الجرح مثل ما يكولون , وخلونه ويه رسالة أختنا العزيزة أم يقين من ديالى , تكول تره الاشاعات مصيبة بحياتنا , وكل يوم نسمع منها كومة جديدة , وتخلينه دايخين وما نعرف الصدك من الجذب وما نفرق بين الحقيقة والخيال , حتى فد يوم قريت منشور يخرّب ضحك لوحدة من أخواتنا , تكول صرنا مثل القطة اللي وكعت من مكان عالي , ومن نهضت سألوها القطط الباقيات ها شلونج عزيزتنا , كالتلهم ما أدري شصار بيه , وهسه ما أعرف أكول حوو لو ميوو , عاد ولا سالفتنه , صرنا ما نعرف إحنه شنو والعاقل يفتهم ...

واحنه نشكرك يا أختنا أم يقين , ونشكركم قراءنا الغالين وان شاء الله نلتقي بزاوية جديدة , في أمان الله