الأحد 2022/1/23 توقيـت بغداد
+9647731124141    info@addustor.com
سماء صافية
بغداد -0.05 مئويـة
نيوز بار
يجعل كلامي خفيف…عليهم
يجعل كلامي خفيف…عليهم
كتاب الدستور
أضيف بواسـطة addustor
الكاتب د.ماري جرجس
النـص :

(3)

 

ووصل التوكتوك عند بيت بهلول الخطير...والاهبل بطل قصتنا قلبه م الفرحة هيطير...الهبل اللي شبهه واقفين طوابير طوابير...اللي شايل بط واللي شايل وز واللي لافح علي راسه فطير...مسا الفل ع اللي لسه عقولهم بخير...وصل الموكوس مكان ماولاد الحرام دلوه...وهو فاكر انهم بيحبوه وهيعلوه ...ويجيبوا الارض كل من يوم اذوه وذلوه...وملك زمانه بعد قاعدة راح يخلوه دخل المكان وكان اللي كان وياريته ماكان...المكان أغلبه نسوان...كل واحدة تتوب مملكة للجان...الشر بيطق من عنيها وساعات جنان...ماتعرف انت عند دجال واللا خشيت برجلك بوابة الموروستان... قعد الموكوس علي كرسي مكسور ...مستني يجي عليه الدور...ياقوةالله ساحر ده واللا اكبر داكتور...البيت هيقع م الناس يادي النور يادي النور... واخيرا سمع صوت محشرج طالع من بق ولية...مش باين ليها ملامح بس لابسة جلابية...اتنفض من ع الكرسي كإن قرمته حيه...ورفع ايده وقالها انا اللي عليه القصد والنية...قالتله امشي ورايا يا عنيه...وبصت له بصه كإنها بتقوله إيه اللي جابك هنا يابن الغبية... ودخل ابن الغبية الخية...برجليه ...ولقي عم بهلول بيندهله وكمان ماددله ايديه...والراجل البجح بيسمي ويبخر والبخور طالع حواليه...علشان النصب يبقي شرعي أومال انتو فاكرين إيه؟! شفتم يا حبايبي الدخلة عاملة إزاي...هو مش زي الناس الوحشة اللي بتتواصل مع الشياطين بانها بتدنس المقدسات او تنجس طهارة....لا لا لا...احنا ترند جديد خالص...احنا رايحين نحل مشاكلنا عند ناس بتذكر اسم الله وسط طقوسهم....شفتم فين الخطر واللا لسه مش شايفيين؟؟ صعب قوي علي مؤمن ايا كان دينه ومهما بلغت صعوبة ظروفه اوو الشر المتملك من نفسه في رغبة الانتقام او اذية الغير انه يدنس مقدساته...فعلشان كده الشيطان عمله أوبشن جديد....وهو الدخول إليه عن طريق بوابة ظاهرها تقي....بمعني أدق..رجل يدعي كذبا وزورا انه يسخر الجان أو له سلطان عليه بسماح من الله.... هنقف هنا شوية...مش احنا عارفين ان كل مملكة مقسومة علي ذاتها تخرب؟....نسهل الكلام شوية...ينفع تبقي مع حد وبتعرف تتعامل معاه وتشغله وتبقي ضده او عدوه؟ طب تيجي إزاي دي...ده أخينا عبد الله صالح بتاع اليمن اللي طول عمره مع الحوثيين أول ما قلب عليهم مكملش كام ساعة وكانوا مفرفتينه...الله يرحمه يبقي نشغل دماغنا..،إزاي حد بيقول انه مع ربنا وبيعرف يتعامل مع اللي ضد ربنا...سواء بالطيب او الردي...انا مع ربنا يبقي مفهمش غير ف لغته .،انا مع الشيطان يبقي مفهمش غير ف لغته...مفيش نور وضلمة بيسكنوا ف حيز واحد ابدا... وبدأ بهلول يسبك الخديعة ...والاستهلالة كانت تعالي اقعد جنبي يا سامي يابن بديعة... واستنوني ف الحلقة الجاية يا حبايب عنيا نشوف لو لسه كنت حية.... ويجعل كلامي خفيف عليهم...وعليكم يتبع الاربعاء القادم بإذن الله  .

 

 

 

 

 

المشـاهدات 42   تاريخ الإضافـة 12/01/2022   رقم المحتوى 13269
أضف تقييـم