ظنيت روحي بالقصيده اكتب شوگ

واكتب ترافة  والگمر شرط الضوگ

والگلب ظل ينبض وهايم مانام

ومن شاف وجهج جفل وتعنه الفوگ

ما جنت ادري الحب بنظرة عشاگ

مدري شجاني وصرت بالحب مشبوگ

گربج مسرة وشوفتج ريحة ياس

حنيت اشوفج مثل متحن النوگ

هايم والعب لعب لعب الرضعان

غفلة خفگ گلبي واحس بي محروگ

عطاب اشم من صدري يطلع دخان

وعيوني تجدح جدح عين المخنوگ

بس رسمج يمرني تمر بيه الاه

ونشغ فرح وبگلبي تنبض لعروگ

وهنا عرفت انه طحت مو مكتول

طيحة محب صبحت بالحب مبيوگ

ويامحله بوگ  العشگ من عين هواي

ساعه ابتسامه

وساعه لعيون تبوگ

عالبعد دگات الگلب تعزف ناي

بس اگرب واسمع تراتيل الشوگ

دمع وضحك طبگن علي  مترهيات

وشريتهن  شروة متيه بالسوگ

وانت شحلاتج نايمه وما تدرين

جم گمر مرني

 وجم فجر بيه يبوگ

نوحي عليج بكثرمترف العين

عاشگ وطرگ اللبن صبح مطروگ

من ريحتج اشتم بگايه النسمات

واسمع صدى صوتك وياخذني الشوگ

مهدي صاحب الحيدري

(بغداد)