أضيف بواسـطة addustor

الكنطره ابعيده

 

حلمانه برد الصبح ؟؟!!

 

حدر التراچـي برد … والكَنطره بعيده

 

أمشي وأكَول وصلت .. والكَنطره بعيده

 

نكَضني مشي الدرب .. تعبني مشي الدرب

 

والشوكَـ هز الكَـلب … والكَنطره بعيدة.

 

**

 

حلمانه برد الصبح … رجَّف خلاخيلي

 

يا دفو جمّل دفو .. ويـا كَمر ضوّيــلي

 

يا ذهب خيط الشمس طوكَين سويلي

 

لايكَلي طوكَـ الذهب والدغش ما ريده.

 

**

 

أمشي وأكَول وصلت والكَنطره بعيد

 

لا .. لا يبرد الصبح مــا تحمل چـفوفي

 

زغيره وچـواني العشكَـ وتوسّد إزلوفي

 

لوذي إعله بعد البعد يا روحي حدر إيده

 

أمشي وأكَول وصلت والكَنطره بعيده

 

كزار ذياب / ابو سرحان

 

 

 

 

 

ياوطن

 

ياوطن

 

يلجرحي بيك

 

إبطول عمري

 

يادمع ليل النواعي

 

أوياحزنها

 

أووحشتي

 

اوخوفي عليك

 

 

إشكثر تقسه

 

إبسرعه تنسه

 

ٱه ياجرح الغميج

 

اللي نحسّه

 

أومانحسّه

 

إبسرعه ننسه

 

الضيم بيك

 

الحزن بيك

 

الدمع بيك

 

أورغم هذا أشتاگلك

 

لهفة طفل مشتاگ ليك

 

إبسرعه أنسه أواشتهيك

 

گدَّرت حزني اويه حزنك

 

گدَّرت ليلي اويه ليلك

 

گدّرت كلشي اويه كلشي

 

أوطلع فيتْ

 

 

أمس گلٌبت الدفاتر

 

أمس گلّبتْ الصور

 

أمس فلّيت الصراير

 

أمس فرّيت الشوارع

 

والسواتر

 

والمخافر

 

گلّبت كل الدفاتر

 

ورقه ورقه

 

اوحيره حيره

 

صوره صوره

 

أوديره ديره

 

أوبيت بيتْ

 

 

قدمينه ارگابنه

 

أوماهمنه خوف

 

گصّرينه إعتابنه

 

أوفاض الدمع حدالجروف

 

ياوطن ممهور بالدمْ

 

بيك نحلمْ

 

يمته نرسمْ

 

خارطه إبلامشنقه

 

أونهران دمْ

 

 

الغير يتحمَّه إعله نارك

 

ونته بالنار إنچويت

 

 

أطول إمن الدنيه عمرك.

 

ليش من دون الدول

 

موبيدك امرك

 

 

ياوطن

 

يامعبد اومسجد أودير

 

ياغني اوشعبك فقير

 

أمس گلَّبت الدفاتر

 

صفحه صفحه

 

بيك مستفحل الموت

 

الصوت بحَّه

 

الحزن بيك إبيابلاش

 

الفرح شحَّه

 

بيد مستهتر أوفاسد

 

بيد ذيل

 

اوبيد حاقد

 

بيد بيّاع الضمير

 

ياغني اوشعبك فقير

 

وين ضيّعت الدليل

 

ليش ضيَّعت الدليل

 

اوتهت ويحكمك عميل

 

عشت عمرك علم شاخص

 

ماعشت طبع الذليل

 

گلَّبتهنْ ورقه ورقه

 

وطن مثلك مالگيتْ

 

 

رزاق الزيدي/الناصرية

 

 

ليلو

          

 

مرْجحني

 

لفني أرْدْ أدفه

 

مابين طيّات الزلف

 

صبْلي عسل

 

من شفّتك

 

خلني إبحلم

 

ليلو ترف

 

ذوّبني لثْغَه أتمرجحتْ

 

مابين شِفّه أوشِفّه

 

ياواهس الماينگطع

 

من ينگطع

 

شهگه أوتموتْ إرويحتي

 

إبلون الخدود الترفه

 

تفّاح راوي إبموسمه

 

ريحان وبفي النخل

 

مامش مثل

 

طولك شبيه إنوصْفَه

حبي إلك

قصّة عمر

ليل أوسهر

موصدفه

 

لفني إبغَنَجْ

 

هدهدني فدوه أرْدْ أغفه

 

 

رزاق الزيدي / الناصرية

 

 

المشـاهدات 883   تاريخ الإضافـة 20/01/2024 - 23:05   آخـر تحديـث 22/07/2024 - 19:33   رقم المحتوى 37973
جميـع الحقوق محفوظـة
© www.Addustor.com 2016