جنت وهمان ....

حطيتك ضلع واتوسديتك اخ

ما حسبت ضلعك باغه

مو مرمر

ولا حسبت دمك من يطك الغيض

واتفرفح اجروحي اعليه

ينسه شبيه طعم  وابساع يتخثر

تدريني صعب ....

واتلاوه ويه الموت  ..

ما عدت عليه وكالت اتكتر

أكابر واعصر بدمي ...

والوج الاخ بسنوني ..

ولا بيك انخذل وبصحبتي اتعير

من طبعي اجادل ... وانقهر

والجم اجروحي بسيف

بس طولك سليم .. وراسك امغتر

احزن ..

وانذبح ..

 وانترس كلي الجروح

بس ما اطيح يمك وانكلب خنجر

صدك ....

ما اعوفك لو فرد نتاك

أظل اشكف بدي ... خافن يلوحك ظيم

وانت ويه الضلع ....

خنجرك يتبسمر

اباهيك بطعنتك والضلوع ارماح

من كثر النزف ظليت تتحسر

مشيت وياك حافي

وعالكزاز سنين ....

ما خفت الكزاز وكلت اتعور

اتجوه بلهيبك ..

واحترك بشتاك ..

واشكم جرحي بيدي وكلشي يتغير

عديت الاجن ....

والراحن معديات

والتكبر عليك وداعتك تزغر

أنه المابيع ذمتي .....

واخسر الجان ...

شلون اتريدني باول جدم

اخسر

عاندت الجرح ...

حد ما توسل بيك

خليته ذليل وكام يتعذر

اليمشي أعلى طوله ...

امبين ومعروف

واليخشى الحفر بالعدله يتعثر..

جبار فرحان العگيلي