الأحد 2022/12/4 توقيـت بغداد
+9647731124141    info@addustor.com
ضباب
بغداد 12.95 مئويـة
نيوز بار
امشيجيخات
امشيجيخات
الرجع القريب
أضيف بواسـطة addustor
الكاتب أبو مطاع
النـص :

* الميستحي كلشي يسوي !!

بعد أن اختلط الحابل بالنابل وشيچت علينه كلش , وصاروا المسؤولين على الشعب أكثر من الشعب نفسه , گمنه نشوف ظواهر غريبة عجيبة , وهي وحين تكون واقفا في السره الخاص بالتفتيش في إحدجى السيطرات تجي سيارة حلوة وحديثة وبيهه شاب مرتب بس ضايج ومتنگ وعصبي , ويجي سريع يضرب السره , ويقول للشرطي والجندي والضابط , وبعصبية وصلافة ولباقة ولسان وخّر عني لك , افتح الطريق متعرف آني منو ؟ طبعا الواوگفين بالسيطرة , ميعرفون هوه منو , ويخافون يسألونه , أخاف يطلع واحد مهم وينعل سلفه سلفاهم , وبعدين شلّهم بالطلايب , أشو المگاريد أبناء الشعب لازمين سره ومحد يحجي , وهذا عصبي وسيارته جديدة , واحنه نگول مثل هذا ومثل غيره هم أهل البله , صلافة ولباقة , وسيارة جديدة ولا مستحه ولا خجل , وشتسوي سوي , وبعد عيني على السيطرات !!

* خطّار كلش خفيفين

عيادات الأطباء هذه الأيام مزدحمة بالمراجعين  , وحتى الأطباء النص ردن تعلموا بروس اليتامى مثل ما يقول أبو المثل , ومرات الناس ميلحگهه سرة , فتظطر للانتظار الى اليوم الثاني , والكشفيان ما شاء الله زادت , والأمراض حدّث ولا حرج , ومع هذا بعض الأطباء گاموا يتبطّرون , يعني لازم يخلي المراجعين ينتظرون ساعات , وهلمرة واحد من الأطباء ترك المراجعين بالصالة مال عيادته الحارة جدا , وظل گاعد ويه صديق جايه خطّار , وگاعدين يسولفون ويضحكون ويشربون چاي وببسي , وتحت شعار "الشغل ميخلص" خلي المرضى ينتظرون , وشنو يعني المسؤولين والبرلمالنيين خو ما أحسن منا حتى المواطنين ينتظروهم ساعات , ويله , العيادة هم تصير مضيف ويجوز مكان لحل الخلافات العائلية , يعني هو الطبيب خو ما طالع من الحايط هم بشر وعنده عشيرة وأصدقاء , وتهي بهي !!

* نشوفك حنطة ..وننطيك شعير

باعة الفواكه والخضر في الأسواق الشعبية , يضعون الجيد من بضاعتهم في المقدمة , ويضعون الرديء التعبان منها في الخلف , وعندما يأتي المشتري ويطلب كيلو غرام من "العنب مثلا" يعطيه الرديء , والممرود والحامض , يعني غير المعروض , وشيسوي المشتري , ياخذ المقسوم ويروح للبيت , ومن يشوف العنب التعبان راح يترحم لأبيه وأجداده , أما إذا اعترض المشتري على البضاعة فالويل له , لأنه راح تصير معركة تستخدم فيها كافة الأسلحة , وستنتهي بجلسة عشائرية يذب بيهه المسكين المشتري كم مليون دينار لأنه أساس التصرف واتهم البائع بالخيانة , وتعال يعمي شيلنه

* حيرة بهالوكت

الأمثال تضرب ولا تقاس , هكذا يقولون , وهكذا نريد هنا , لأن والله العظيم احنه معلينه بالسياسة , لأن الوضع حسّاس وميسمح بأي كلام فيه رائحة سياسية واحنه ناس نخاف وعدنه عوائل , يعني لحد لا يأول , ولا يباوع إلنه بعين انت تقصد كيت وكذا , المهم إخوتي وأخواتي , قضيتنه صارت مثل الهر الذي سقط على رأسه من بناية عالية , وحين رفع رأسه وهو دائخ , هزّ يده " ما أدري شلون هز يده , يله هز ذيله وهو يقول " : ما أدري حو ...مدري ميو , تاهت علينه , تره إحنه هم تاهت علينه ؟!

* ما نخلص من شوفتهم النحسة

طبعا الكتابة أي كتابة حتى لو كانت موضوعا في الإنشاء لطالب في الاعدادية , يجب أن تكون صادقة وتخرج من ضمير حي , أو أن يصمت صاحبها ولا يقول شيئا , أو على الأقل يكون محايدا , ولا يقول للأبيض أسود وللأسود أبيض , أما أن تستأجر الأقلام وتكتب خلاف الحقيقة من أجل تجميل صورة معينة أو تشويه موقف أو شخصية , يعني تصير حينها اللغة مثل حمار جحا , نركبها لنؤدي الوظيفة التي نريد , وبشواهد مزورة وأمور مصطنعة , هذه الأقلام يا جماعة الخير كثرت هذه الأيام , وهي صارت معروفة بانتهازيتها ونفاقها , وصار الناس حين يرون مادة لهم , أو حين يخرجون عليهم بوجوههم الكالحة عبر الفضائيا , يقولون عنهم : أو هووو هم هذولة ما خلصنه من كتاباتهم هنوبه وجوههم .

المشـاهدات 1318   تاريخ الإضافـة 18/06/2020   رقم المحتوى 7442
أضف تقييـم