* كورونا ..فيلم رعب !

جائحة مدري جامحة مدري جامعة " كورونا " خلت العالم يترادمون بيناتهم , حيرة وخوف وهلع , ومحد يدري شيسوي , والمصيبة يومية سامعين معلومات جديدة عن هذا الوباء و مرة يكولولك البس كفوف وعوف الكمامات , ووراهه بكم يوم يطلع واحد ويكول  , لا يابه شنو هذا الكلام , عوف الكفوف والبس كمامات , وبعدين يجي علامة آخر يكول اكلوا ثوم , ويجي واحد غيره يكول لا يابه البصل أحسن , بعدين اجه واحد غيرهم وصاح وجدتها , اكلوا سماق , وبعد كم يوم طلع واحد وكال الحل عندي شربوا مدري شنو , وهكذا صارت عدنه دوخة وحيرة , وصونه ما ندري شنو الصح وشنو الغلط  , والإصابات يومية تزيد والوفيات تكثر , ولغز كورونا محد يحله , والله كريم

* صرخات الشيباني !

أبو علي الشيباني اللي صار أشهر المشاهير و يومية طالع بسالفة جديدة , ويكول أخبرني معلمي , وكال تره يلعراقيين بعدكم ما شفتوا شي و لأن البلاء الجاي أصلا أبشع من كورونا , وراح تصير كوارث   ما الهه حل  , لأن معلمي يكول بهذا الشهر راح تنزل بلاءات مو بلاء واحد , واحنه نكله يا عمي عوف العالم وخلي معلمك بس يحجي وياك ,  العالم شنو ذنبهه يومية طالعلها بشغلة جديدة , وماكو يوم طلعت وكلت معلمي يكول راح تفرج وان شاء الله الخير قادم , يمعود ما تكللنه معلمك شعنده ويه العراق والعراقيين , ولو انته كل سنة تموت مسؤولين وتحيي مسؤولين , وتاليههلا اللي كلت عليهم يموتون يموتون صدك , ولا اللي كلت عليهم يعيشون يعيشون صدك , وما فد يوم كلت إجاني معلمي وكال اعتذر تره توقعاتي طلعت غلط ..

*ضرب الفساد ..صدك كذب ؟

كلش تعودنا , أو كولش تعودنا , على أن نسمع تصريحات رنانة وعاصفة وقوية تريد ضرب الفساد في العراق , وننتظر ونكول يا الله , راح ينضرب الفساد ونخلص , ويجي يوم وثاني , وثالث , وننتظر , وبعدين تطلع طلايب وتشغل المسؤولين عن ضرب الفساد , لأن أكو أولويات بالموضوع , وعود بعدين ضرب الفساد , إللي صار مفردة تلمع وتتوهج في قاموس بغداد للتصريحات النارية اللي تخدرنا وتقدملنه مخدرات فعلها أقوى من المخدرات اللي جاي تفتك بهواي شباب عاطلين عن العمل وفاقدين الأمل , واحنه ننتظر , ونشوف شلون راح ينضرب الفساد ومنو أول واحد ينضرب , لأن هم مو مخفيين مبينين وواضحين بس نريد واحد أخو أخيته يوكف بوجوههم    

* خوما كو كوه هي !

المبدع الرائع فارس حرام  يقول : أعرف أنه ليس "دكتور"... ويعرف أنني أعرف انه ليس "دكتور"... أهله يعرفون أنه ليس "دكتور".. وأصدقاؤنا نساءً ورجالاً كلهم يعرفون أنه ليس "دكتور".. وهو يعرف أننا جميعاً نعرف أنه ليس "دكتور"..مع هذا يصرّ على أن يصف نفسه بـ"دكتور".

* بلاء العراقيين

المجتمع العراقي مبتلي بهواي جهلاء, وكلاوجية ,  وهذولة الجهلاء والكلاوجية طبعا يحاولون يخربون كل شي زين ,...لا ...لا ...مو آسيا , يعني كل شي بيه خير , وأساليبهم عجيبه غريبة , لأن بعضهم كلش مقنعين , ومن النماذج اللي توديك للشط وترجعك عطشان , وهاي الفترة تشهد من هذولة  عدد كبير , لأسباب عديدة أولها ان الشغلة تايهة وهوسة , وأكو خلط واختلاط بالأوراق , لذلك ومن طبقنا مثل ما تعرف حماهه من رجلهه , صارت كلش واضحة شغلة التيهان , وآخر ما توصل إليه الكلاوجية , هو اللبس الجميل , والأسلوب المعدل , ويجيك ويكلك , يابه تره ناسي محفظتي بالبيت وتفاجأت وأنت طبعا , خجلان , وما بجيبك غير عشرة آلاف دينار تنطيهه إله وأنت تعتذر عن التقصير , ومن يروح من يمك تكول , ها آني شسويت , وتروح مشي لبيتكم , وانت غارق في غيمة حيرة وتساؤل ,وشلون صادوني وآني النجر !؟

* سؤال بسيط !

ومن صفحة المبدع شوقي كريم حسن نقتطف ماجاء به " سؤال بسيط ؟ لماذا لم تجيش السعودية جيوشها لتقف مع العراق وهو يحارب داعش وجيشت كل هذه الاقوام لتقف ضد مااسمته التمدد الحوثي... هل يعقل ان يكون الحوثيون اخطر من الدواعش؟!!