الثلاثاء 2023/2/7 توقيـت بغداد
+9647731124141    info@addustor.com
غائم
بغداد 15.95 مئويـة
نيوز بار
امشيجيخات
امشيجيخات
المتفرج
أضيف بواسـطة addustor
الكاتب أبو مطاع
النـص :

* وين الرواتب ؟

قضية الرواتب اللي صارت تدوّخ الحكومات , صارت محنة حقيقية , بوقت الناس محتاجه الفلوس , لأن ما بقه إلا الراتب اللي يستلمه الموظف والمتقاعد , لأنه بسبب وباء كورورنا اللي عرق حقق بيه تقدم واضح , وراح يصير الأول بالعالم , بعد أن غلب الدول العربية وخلاهه وراه , سواء بعدد الإصابات أو بعدد الوفيات , وبالتالي انتركت الشغلة وانرفع الحظر وكلمن بكيفه , لأن الوضع تخربط فخلي اللي ينتظر الراتب يشوفله شغله , وأهل الشغلات والأجور اليومية خلي يطلعون لشغلهم , وخلي كورونا تصول وتجول إلى أن الله يفرجها , ونشوف وين توصل شغلة الرواتب , ومن يقترضون بعد قادتنا الحكماء ومسؤولي الدولة العراقية , والك الله يلفقير 

* السفارة الامريكية ؟!

أمريكا زعلانة على الحكومة العراقية , لأن سفارتها تنقصف وقواتها تتعرض لهجومات , وحكومتنا تكول احنه نحلها يمعودة أمريكا بس لا تزعلين علينه وتغلقين سفارتج , وبعدين كل الدبلوماسيين بالعراق يسوون نفس الشي , ونصير معزولين عن العالم وتزداد أزماتنه , بعدين انت تعرفين كلشي يا أمريكا , واحنه حكومتنه ما تكدر على الدولة العميقة والفصائل المسلحة , والحل أول وتالي يمج , بس خطية الشعب تره ما اله ذنب بكل هاي الطلايب , والناس حايره بلقمة العيش .

* فساد وفضائح ووعود وانتظار وتساؤلات

يومية شغلة فساد وهبة وفضايح وهذا اتهم هذا وهذاك اتهم هذولاك , وفلان باك مليار , وعلان باك عشرة مليارات , والبلد مفلس , وأكو تقشف , وكلهه تصيح وتنادي يا نزاهة يا برلمان يا حكومة حاسبوا الحرامية , حاسبوا المفسدين اللي نهبوا ثروات العراق , وتتحمس الحكومة , وراح نضرب بيد من حديد كل الحرامية , واحنه ما نريد يد من حديد , من خشب من تنك , وحنى لو من ورق , بعدين إلا ضرب , خلوها قسمة جمع ليش ضرب , لأن الضرب هم رياضيات وأرقام , وتاليهه من يصير حساب , ومصلحتي ومصلحتك , وبالتالي يكون الناتج , يضمضمون الشغلة , والناس تنسه , والفاسد يرفع صدره ويروح يستجم بمكان هواؤه نقي , حتى يريح نفسه من دوخة السين والجيم , واحنه ساكتين واحنه الممنونين .

* ليش هيج ويه المواطن ؟

كل أزمة تواجه البلد , يتحملها المواطن , وهاي ضريبة هذا المواطن في بلده المنهوب في وضح النهار , هم قطع بالرواتب وهم زيادات بسوء الخدمات وهم فساد , والمسؤولين ما عليهم , المهم أموالهم محفوظة ومضمونة ومصانة وتزيد ما تنقص ويه كل أزمة , لأن هم يعرفون شلون يفرونها علينا وياخذون ويخمطون , ومنو يقره منو يكتب , المهم الضريبة يدفعها المواطن , وهو يتحمل ظروف وتقلبات البلد وصعود ونزول أسعار النفط , وعبالك احنه بهذا البلد محصلين شي من النفط الأسود المصخم اللي دمرنه بدل أن يخلينه أغنى البلدان , يلا يا مواطن اشبع ضيم والجاي تره أدهى وأمر , مو تكولون ؟!

* خد................مات !

نريد أن نتجوّل في بعض ساعات الفراغ , بصراحة نريد أن نهرب من البيت ومتاعب الخدمات , وخلص الكذا ونريد الكذا , والكهرباء انقطعت ومولّد المنطقة عاطل وراح نموت من الحر وكل شيء في الثلاجة راح يخرب , المهم قلنا نتجوّل في منطقة شوية تفتح النفس في بغداد , وهكذا تأخذ عائلتك في عصريّة يوم خميس تروح تفتر شوية , وإذا بك تشاهد سواقي المجاري ذات اللون القريب للسواد , والبنفسجي والرمادي والرصاصي , وتحاول أن تبتعد عنها , لكنها تواجهك لتقطع عليك الطريف فتبثّ الروائح وتهدد ملابسك بالتلف مع قدوم أوّل سيّارة هاربة من الازدحام , وصاحبها صاير نار , أما المجاري فبعد ما تفرّق بين صيف وشتاء , والبلدية والأمانة شعليهه , المهم أن تزرع نخل , وأن توجّه الناس بعدم قطع الورود , طبعا إحنه في بلد الرومانسيّة والرقة !!

المشـاهدات 1113   تاريخ الإضافـة 01/10/2020   رقم المحتوى 8651
أضف تقييـم