أضيف بواسـطة addustor

* رواتب الموظفين

اول تالي بالعراق الموظفين بدون رواتب , والمصيبة السلطات ببلدنا العزيز واحد يذبها براس الثاني , وخلونه نتساءل البرلمان مسؤول لو الحكومة التنفيذية , البرلمان يكول ما أشرّع كة , الاقتراض لأن يودي البلد للتهلكة على أساس البلد بخير ونعيم ومرتاح وفايخ ومنشنش , أما الحكومة فتكول بأعلى صوت ما عندي فلوس , وما عندي حل غير الاقتراض , والموظف ينتظر ., ويحاول يحل الحزورة العظيمة الدجاجة من البيضة لو البيضة من الدجاجة , معناها البرلمان هو السبب لو الحكومة , وفرضا انحلت هذا الشهر واقترضت الحكومة , الشهر اللي بعده شلون , راح يصير الاقتراض أصعب , وهاي المرة تصير مو اقتراض تصير لله يا محسنين .

* لعد الموارد وين تروح ؟

مرات يطلعون بالتلفزيون ناس اقتصاديين يحجون عن موارد البلد , ويكولون ممكن تخلينه نستغني عن النفط , وفعلا تحرك رئيس الوزراء وراح للمنافذ الحدودية , وكال راح تصير للشعب العراقي , وكلنه والله خوش , وكال نضرب الفساد بيد من حديد , وتم القاء القبض على مجموعة واعترفوا بالأموال المسروقة والمهربة والفضائيين , يعني هم صار باب ثاني , بعدين أكو مبيعات وضرائب وواردات محطات الوقود والمطارات وهيئات النقل واشياء هواي احنه ما نعرفهن , بس بيهن موارد تسد حاجة البلد , وفد يوم واحد من المسؤولين طلع وكال واردات المنافذ الحدودية بيوم واحد كذا مليار , والموانئ ما ادري شكد  , زين هاي مو فلوس ؟ وين تروح غير المفروض تكون عند المالية لو شنو مصيرهن , قابل غركن , لو أكلتهن الطيور , لو تبخرن , لو ما اعرف شنو ؟

* ترامب مصاب

الرئيس الأمريكي ترامب مصاب بكورونا وراح للمستشفى يمشي على طوله , ومتنك وشايل خشمه عبالك مو للمستشفى رايح مدري وين , المهم بالليل كالوا انتكست حالته , كلنه راح يموت ويصير افلام كارتون اللي كالوا بيه يموت فعلا صحيح , وتصح نبوءة أبو علي الشيباني مدري عرافين وعرافات اخرين , وره شوية كالوا تره كلشي ما بيه وصار مثل الحصان , يوم ثاني كالوا لا بعده , هاي شنو , البعض كال عنه هاي لعبة سياسية الهه علاقة بالانتخابات وهو يريد يسرق الانظار ويكسب الوقت والى آخره من الاستنتاجات والتعليقات وغيرها , وما نعرف حقيقة الأمر صدك وفعلا السيدة الأولى عدته , وانصاب وراح يطيب , لو يطلع افلام كارتون صدك ؟

* كورونا

بعد ان استوعبنا موضوع كورونا وصار شي من حياتنا اليومية , كمنه حتى ما نتابع الاخبار وعدد الاصابات وعدد الوفيات والشفاء , لأن ملينه والناس بعد ما بيهه حيل تبقه تنتظر وخايفه ومحد يطلع , والسلطات الصحية هم رفعت الحظر , وكالت كل واحد يواجه مصيره , لأن لازم نتعايش ويه المرض , لأن هم رواتب ماكو وهم شغل ماكو , لازم المواطن يشوف دربه ويطلع يدور رزقه , واللي ينصاب ويموت الله يرحمه , واللي يشفه هنيئا اله , وخلي ترتاح خلية الازمة والجهات الصحية , لأن كلمن بكيفه ...والعاقل يفتهم ؟!

* ابتكارات في الأغاني

سنتحدث هنا عن الأغاني الجديدة مرة أخرى , فهذه الأغنيات تفاجئنا دائما بالدهشة والاستغراب وهي تغور في الأعماق القريبة من السطح "الضحالة "والاستخفاف بالذوق العام , ومع كل تقديرنا للرأي  القائل أننا مع خطاب الشارع وبساطته واستيعابه , ومع الوعي البسيط الذي جعل من خريج الكلية يعرّف  الشخص اليساري بأنه الشخص الذي يأكل بيده اليسرى , لذلك صار الشعراء يقتربون جدا ..جدا .. جدا من هذا الوعي وصارت كلماتهم لا تقبل التأويل ولا تقبل القسمة على اثنين , لذلك بدأنا بالبرتقالة والرمانة انطلاقا من المشمشمة وانتهاء ب"بس لا من صدك متحبني" ويمة لدغتني العكربه , وما نعرف الوضع المتوتر الجديد في الحياة شراح يطلع من أغاني ؟!

 

* تحالفات  

الكهرباء كلش زينه هاي الأيام , والله يوفق وزير الكهرباء وكل اللي سعوا لحل هذه الأزمة التي ظلت لغزا سنوات ٍ طويلة , وإن شاء الله تستمر بحفظ الله ورعايته وحرص المواطنين عليها , أما المولدات الأهلية , فيبدو أن مسؤولي الكهرباء يعرفون أنهم محد يجدد اشتراكه وياهم اذا استمرت الكهرباء , لذلك من يجي راس الشهر , تبدي قطوعات الكهرباء , حتى أبو المولد يشغل المولد , والمشتركون يقولون أي والله صدك , لازم ندفع فلوس المولد , لأن شغلة الكهرباء بأي ساعة تصير ماكو , وهكذا , هنيئا للشعب العراقي على هذه التحالفات الوطنية !!

المشـاهدات 1323   تاريخ الإضافـة 08/10/2020 - 00:34   آخـر تحديـث 21/03/2023 - 02:11   رقم المحتوى 8756
جميـع الحقوق محفوظـة
© www.Addustor.com 2016