مالات الاول ! ---------------------------------- اليوم اول مره أشوف حجيّه تقيّه ، كتله من عطر العود الفاخر ، كشخه ، العبايه يمكن حرير ، والشيله بريسم ، والوجه يلمع ، وأحمر ، وينفط دم .مرت من يمي ، وأنا واگف المغرب ، أرشرش بالشارع ، اللي يوميه حافريه ، طبعا حكومة كربلا ، من گد ما دفانه ، بس يحفرون بالشوارع .سلمت عليه ، وشلون سلام مال حجيات ، شيخيات ، مالات الأول : الله بالخير خويه ! مليون هلا بالحجيه ، أهلا ، وسهلا ، وكثير مرحبا أموت على حجيه تقيه ، أحب الحجيات الكشخه ، المعتبرات ، والحافظات الشعر ، والتاريخ ، والاصول . طبعا الحجيه عمرها بالخمسه وستين ، وتگلي : خويه ، ولابسه شحاطه سوده روغان بيها علامة شانيل ، روحها خضره ، الحجية ، رغم هي هم أرمله صار أربع سنوات . يسولفن عنها النسوان ، يگولن من تتذكر رجلها أبو رشدي ، تگول أروح فدوه لتراب رجليه ، وتترحم له وللبطن الجابته ، وتجر حسره طويله ، وتخنگها العبره عمت عيني عليج حجيه ، حيل مغزره بيچ العشره ، مو مثل نسوان هالوكت ! مدري منين تجيب دهن العود هذا الخفيف ، ريحته ترد الروح ، چنه ريحة ورگ الشجر من يتبلل .من رجعت للمطبخ ، سألتني أهلي : هاي حجيه تقيه السلمت عليك ؟ شمدريچ ؟ أولا : ريحة العود وصلت للبيت كله ، ثانيا : ردت تزوع روحك من سلمت عليك : أهلا وسهلا وكثير مرحبا غير جيرانه ، ورد السلام واجب جيرانه ؟! لو أم جيرانه ؟! والله مسبّل روحك ، للرايح وللجاي ، شلون ما أشوف ، حجيه تقيه راح تصير عمتك ! لا يابه ، ماكو هيچ شي لايابه ؟! صنوحتي ؟! سالفتك وي أم عصام گاموا يسولفوها بالقرايات ! راح تجلطني , لا حبيبتي ، حياتي ، كلها إشاعات , لا تگيسني نهائيا ً ، روح إلزم مفاتيح الجنان وإبچي ، أبو إدميعه ! لا حول ولا قوة nbsp ---------------------------------- المتفر أضيف بواسـطة : addustor المشـاهدات : 2206 تاريخ الإضافـة : 08/10/2020 آخـر تحديـث : 29/03/2024 - 03:28 رابط المحتـوى : http://addustor.com/content.php?id=8759 رقم المحتوى : 8759 ---------------------------------- جريدة الدستور Addustor.com