مهداة الى الصديقة العزيزة

(نضال جودة) التي طلبت ان اعيد نشر هذا النص:

شـيلة امـّي .. يا عـطر ياس او بـخور

شـيلـَة امـّي

مسـچ .. هـيـل اوبـيهـَه نـور

شـيلة امـّي

ابـريسـَـم اوشـَـدَّة اورد

شـيلـَة امي

شـَـذره زرگـَه

ضوَّه چلاّب الجبين

والعبايـَه امطـَرّزَه فـضـَّه

گمر يضوي .. مدري عين

عين كهرب .. بحر ازرگ

ورد يسحر .. طعم تين

هيبه امـّي

كلهه تنصت لو حچيتي

ابچي وانحب

ما وفيتچ كلـّي ديـَـن

حضن امي دافي ضمني

شوگي هزني والحنين

ابگلب امي كون انامن

واغفه .. تاخذني السنين

أنسه روحي ..

أنسه اسمي

أنسه كلي

أنسه لوعات او ونين

صوتچ امي چن اسمعه

ناي يسحر

مدري بلبل لو كناري

فرفحت روحي..

وآنه اريدچ

ارد اضمچ ارد اشمچ

هذا عطرچ هالأشـمـَّـه

چن عبيرچ هذا يمّي

أصحه ادور

وانتي وين ..؟

وانتي وين ..؟

هامش

الشيلة (الفوطه) رمز للأم العراقية..

ميسون نعيم الرومي