انا مناطر عمر بلكن تمر طيف

واشكيلك واشوفك نار لوعاتي

واشوفك چم جرح ينزف بالاضلوع

خاويته وصفت شوغات ضحكاتي

بعد ماريد أذكرك وأبچي عليك

لأن وسفه عليك تسيل دمعاتي

حرام سنين بالغش خلصت وياك

ونذبحن صبر وياك لحظاتي

جرحك مانشف أچمن بالاضلوع

وتيزاب أحس بحشاي وناتي

صارتلي طبع الونه بسكوت

ومل مني الصبر واشتكت اهاتي

ماأدري عشرتك تصبح اهموم

وبعز الظهر راوتني نجماتي

خلتني محبتك ناشف الريج

ولبستني اسف صارت طبع شوغاتي

صرت انت بحر بيك انا بلام

وي مدك اكابر ضاع مرساتي

مليت الهجر مليت الأفراگ

ونعجنت بالم وحزان حسباتي

يلماخذ حنيني وطعم الايام

يسألوني وجوابي عليك وناتي

يلمالك منامي وصفنت اليل

تعال اتورجت علحال. شماتي

صبر يطحن صبر ماظل صبر دوم

تهت وتيهت والمرسه صفناتي

ألمن اشتكي واكشفها الجروح

من يسمع بعد خرسات چلماتي

مو كافي تعال وشوفني شلون

صغت من الدمع للملگه شمعاتي

صرت مدمن سفر بلكن الاكيگ

تعال ارجوك ملتني محطاتي

رزاق المطيري