كامل العامري شاعر الوجع العراقي 

...

امشي خطوه..

ارجع بعينك خطوتين

اضوي نجمه ..

تطفي بيدك نجمتين

وياهو يوكف حد سمه وحد كاع

ويردني بنبض حبر الدفاتر جلمتين

الشوك صوت..

السكته صوت..

الموت صوت..

ولو صفن وجه الفرات..

ايبيع موته ويشتري للمشاي صوت

وموكلافه ابسعفك المحني اعله كلبي

تسافر بحيطان خرسه

وتعتني لدنياي صوت

انت موتي وياحلاتك

من تجيني ويه السفر خطوات موت

خاوي عمري .. عمري من عمري خجل

وشوفي من شوفي خجل

تدري حسبات المشه بروحه الخجل..،

موت وحياة

كلبه يعثر بالنبض والمستحه

وعينه تعثر بالدمع والمستحه

شلون تغمض عين خاواها دمعهه

وكل رمش بيها شجر للمستحه

جفوفي سطرين ومسافه..

اشما تصب نهران صبرك..

تبقه حدين المسافه البينك وبيني جبيره

الماي تاريخ وعشك طينه بضميره

وسافر ابعرج النخل ملحه بضميره

وغنه شمسه وكمرة الليل بضميره

الماي.. ماي

لكن انته ولاصفه من الماي شايل

انته جنحين بكلب عصفور ماتن

الكاع موتك..

والسمه اعله المشتهه تسافر خيال..،

وياخيال اليصدك ابجدم التوشل

كطره كطره من الصدك

انشد انشد..

من تجيك اعيونك ابجذبك تجاوب

تخطف اعيوني وجوابك

ينطفي ابعيني سؤال..؟

الروح مديوره اعله كلبك

تذبح الجلمه بصلاتك

قبلتك وياك تحجي ..

تذبح الشوك بلهاتك

شوكي يتسنبل خناجر..

للتراب العاشر اجدامك

سفر عمرين يحجي

بيع وجهك .. بيع دمك

بيع كل لحظه برفيفك .. واشري لعيونك رمدهه

عيش ميت

هاي سولة كلمن بشوكه يبيع ويشتري

...

( كان قلبي مثل وجه الماء في وجه الضياء.. كان يلغي كلما يحمله الزيف ويمضي باتجاه واحد..يسرج النبض حصانا ويسافر)

...

ريت يومك ينصلب ويموت امس بعيون باجر

ردني ردني..

وجهي يرفض لون وجهي

وعيني ترفض ماي عيني

وعمري يرفض باجي عمري

ردني ردني..

لون مثلك شوكي بيع ومشتره

جا غمض ليلي ابنهارك وانطفيت

الكاع ظيم..

الخطوه ظيم..

بيا جدم نمشي لبختنه بياجدم

بياقصيده انفك حزنه بيا قصيده

جلمة المذبوح سفره

وسجة السفره بوريده

الشوك غورب..

ياعشك انفض رمادك واشتعل دنيه جديده..

اختيار : عباس عبد الحسن