كل الهله بيكم أعزاءنا القراء , نتمنى أن تكونوا بخير وعافية , وأن تكونوا في مأمن من وباء كورونا , وأيضا بمأمن من العوز والحاجة بهاي الظروف الصعبة جدا , واللي جاي تمر علينا واحنه نتحمل الضيم ونصبر على كل ما يحصل لنا بسبب حكمة الحكومة وسيادة القانون وقدرة الدولة على حفظ ثروات الشعب ومقدراته ومنع الفساد , مو صحيح ؟ ! لا تضوجون يمعودين تره جاي نمزح وياكم ونضحك , على طريقة شر البلية ما يضحك مو بله , المهم خلونه بجو الفرفشة وخفة الدم , واليوم مع رسالة الاخت ام محمد من البصرة , اللي ارسلت لنا رسالة بيهه سالفة ورباطها , تقول عنها هايب يهه هواي معاني تنطبق على وضعنا , وهي سالفة الكلاوجية , واحنه نشكرها باسمكم على هذا الاختيار , تقول أم محمد في سالفة الكلاوجية  : اكو قرية مال كلاوجية وكاعدين لا شغل ولا عمل عايشين عالكلاوات فد يوم واحد منهم كال لربعه راح اجيبلكم شغلة نعيش منها العمر كله , كالوله :: توكل،، اكو قصر مال ملك بالولاية راح هذا  الكلاوجي للقصر طب ع الملك سلم عليه و كاله :: يا ملكنا احنا اهل القرية الفلانية و احنا شغلتنا نحوك زوالي و نريد نحوكلك زولية زينه  , كاله :: الملك روح ما محتاجين زوليتك القصر متروس زوالي , كاله :: ملكنا الزولية إلي نحوكها الك تختلف عن كل الزوالي اليمك ،،كاله :: شلون يعني فهمني , كاله :: ملكنا احنا نخلي وي الصوف مواد بحيث الزولية ما يشوفها ابن الحرام بس ابن الحلال يشوفها , تعجب الملك و صدكه كاله اذا هيج سويلي وحده , المهم اتفقوا على السعر و جان السعر كلش ثكيل و اتفقوا شهر و تخلص الزولية , ورا شهر اجى الكلاوجي هو و ربعه واحد يمشي ورا الثاني و جفوفهم بمستوى جتافاتهم كأنما شايلين شي و همة كلشي ما شايلين , طبوا للقصر نزلوا اديهم و دفعوا الهواء كأنما يفرشون زولية ،،،وزراء الملك ظلوا واحد يكول للاخر عاشت اديهم و الثاني يكول ألوانها حلوة و الثالث يكول شغلها مرتب وحلو , الكلاوجي كال للملك ::ها ملكنا شلونها الزولية؟؟؟الملك اخذله صفنه كال اخاف احجي و يكولون ابن حرام ،،،،المهم كاللهم :: عاشت إيدكم وبالعافية عليكم الفلوس ،،،هههههههههههههههه , المهم شاهد سالفتنه ورباطها هو ايكلك الملك تعلم الصنعه وصاير خوش يحوك زوالي وكل اليسوي يمه زوليه يكله عاشت ايدك صاير فنان خوش تحوك زوالي , وتبين الملك هسه جاي يحوك الزولية الجبيرة على الانتخابات الجديده , جا انت يا خوي شمالك عطال بطال ما تعلمت الصنعه يا حظي لا والغسمه ...

طبعا واضحة معاني سالفة أم محمد , واحنه نكرر شكرنا لها على هذا الاختيار الجميل , ونكتفي اليوم بهاي الرسالة المعبرة الجميلة وإلى لقاء في الزاوية المقبلة .