شارع وخط العبـور وبالكونه وفَـيْ عِماره

انفتح شبّـاچ محبوبـي

وشفـت دخّان گهوه

وأشّرتلـه ودزلـي قُبلـه

ابخيط دخّان الجگـاره ..

هاذه مَشهد من درابينـي الحزينـه

اذكّريتـه ومِشت رِجلـي

ومِشت في روحي المدينـه ..

الذكريات ادّور مثل الإسطوانـه

ذكريات اخذتنـي أجلس في مكانـه

يم سوالفنا البقت يم كهرمانـه ..

وكهرمانه مثل ما حفظت قصرها

حفظت اگلـوب المِـشَـو وبلا رجـوع

وهسّه مو زيت التِرش اترش دمـوع ..

سيارات سيارات ما تتعـب سَفَـر

الجّسور الضاويـة طوگ النهـر

والنهر يمتـد اسنيـن ابلا نهايـه

ويشرب اخبار الضجيج ال بلولايـه ..

صاح نازل طاح كوكـب

نَجِم يَهـوي خِسَر سِعـره

وذاك واگـف يم محطّـات العمـر

مِشتعـل نجمة نهار ابلاضـوه

وخاط استكانه العل رصيـف

وشرب روحـه وقايض اجروحه ابدوه

نافذ اكسباير وسولفلـي قضيتـه

ومِـن سمعتـه أجّـرت چـادَر

گبل ماتوصل النّـاس وتعزّينـي ابمنيتـه ..

وذاك يتلو ابسورة الحلّاج

دافع تذكرة نزفـه وسره المسرح طويـل

وبيده عِكّـازه تِـجِـر أيّامـها حِمله الثگيـل ..

موگلتلك

لاتِخِط قطعة دعايه ابساحة الأحزان

وتروج ال أمل متعوب ياصبري الجميـل

استقالات المباديء كِثـرت

وميز التواقيع ازدحم جنطة رحيـل ..

مو گلتلـك

لاتغـرّك بَـهرَجة ذيـچ السقوف

إحنه مَوضِع حرب

نُـفرَغ نمتلـي ابكيف الظروف

إحنه عين الكاميرا الكلشي تشوف ..

والحچي اهواي اليدور أعله الرصيف

الينحفـظ بفطور حيطان المَحلّـه

ويجي يوم وتنقرى احروف المَسَلّـه

والأغاني اترمـم ابيوت الثكالـه

اتصبّـر الوجه الشبع صفعات من كف العداله

والحقيقه اتبدّلـت نِزعَـو شَرفـها

ولبّسوها اسمال يم بـاب الوكالـه

اشگد خطيّـه

انباعَـت ابرخـص العَمالـه

اتساوت ابقيمة زبانـه

وبزمانه وبزمانه

كِلمـن ايحيـر ابزمانـه

وهاي قصتي ابشارع الكرادة داخل

سولفتها ابكـل أمانـه

وهسّه الله وياچ اگلّـج كهرمانـه

كهرمانـه

كهرمانـه

كهرمانـه

#إحسان_العيد