رديت بطرگ نص روح

لاحيل .. اليعبرني

ولا صوت المطر يبره

يسكتني ظلام الشوگ

وأرجع خطوه یم طاريك

وابدي بضحتکك أقره

وتجف أنفاسي .. لو مرها ..

سموم فراگ .. وأعبرلک

وارش عالريه الك ذكره

وترويني .. وتفز بیه

اعله گد .. شوگي ولهفتي

وخضرت گمره

اجیتك .. گوم دايني

صبر .. وايمان ..

حتى اگدر .. علی الحسره

وألوي عنان ..

گلبي العتني لعيونك

وأگيده .. بسلسلة صبره

تلگاني .. انا مفرهد

وجف العوز ..

عنگود السنین ..معلم يلوحه

اجیتك .. بس جسد

باگو تفاصيله

ولا روحه اعرفت روحه

لگه حبال العمر ..

تنسام حيل رخیص

لنها تفصلت للآه مرجوحه

تلگاني انا السكران بهمومه 

ولظم بیده الوهم ..

ویخیط جروحه

اجيت من المنافي رسوم

بيها الآخ .. مملوحه

اريد تحلل .. الملگه

وتحط فتوی بمواعیده

وتخلي الما تصير ..

تصير مسموحه

گوم آگعد تلگاني ..

ولني الوحده .. والحيره

وعلي دارن صفوف صفوف

وبظهري حمل تاريخ

فك بابه لقلم حزنين

وضلوعي فرشها رفوف

وبروحي ملاحم ..

صكصكه ودخان

ورماح .. وصليل سيوف

مر بيه .. وتعناني

تعال أگرب .. وگلبني

بلاوي الما شفتها ..تشوف

تلگه انسان .. منحوت بتعب

ومن الوجع مسگوف

تلگه الریح ..

تعبر .. گنطرة عمره

ويدگ لیل المنافي دفوف

هذا آنه ..

اجيت من المنافي

رسوم للغربه

نزع نبضه الصدى بصدره

ولبس گلبه

الك كل وجهتي انويها

وادورك موعد ومرسى

وحلم كل ثانيه مجربه

تلوگ ویاي ..وي جفني

وتوالم عمري 

وفصال اعله گد تعبه

انا الما شافته جروحي

ترس عيني ..

انا الحرمان علمني

وشفت ربه

اجيتك سالفة منفى

حرف يستغرب الثاني

ويگل الناس عن چذبه

*جواد الدراجي

( البصرة)