الجمعة 2024/3/29 توقيـت بغداد
+9647731124141    info@addustor.com
سماء صافية
بغداد 27.95 مئويـة
امشيجيخات
امشيجيخات
المتفرج
أضيف بواسـطة addustor
الكاتب أبو مطاع
النـص :

*  اللي قبلي هو السبب ...والقبض شنو ؟

أجمل شي بالمسؤولين انه همه كلش وطنيين ومخلصين ويحبون الشعب ويحاربون الفساد , ويؤمنون بحق التظاهر في بلد الديمقراطية ...بس ....؟ أو ولكن ؟  القضية مو سهلة , وما عدنه عصا سحرية للحل , وهاي تراكمات الحكومات السابقة اللي المسؤولين عنها ورؤساؤها لو يتفرجون على هذا شراح يكول , لو غالقين شبابيك كلشي ومصعدين الجامات وكاعدين ببلدان بعيدة , المهم هذا تراكم , والكهرباء راح نسويهه على الصيف القادم !!!! مثل حجي العام وأول العام والعام اللي قبله , والمتظاهرين شكلنه مو بس لجنة وحدة , لجان تحقيقية , والفساد راح نطيح حظه , بس لو نلكه فد دليل مقنع ...وهكذا , واحنه المساكين المكاريد , لا كهرباء ولا ماء ولا راحة بال , وفوك هذا كله كورونا لنا بالمرصاد , واذا واحد يكول لهذوله الطبقة المدري شنو انتم دمرتم البلد , راح يكولوله انت تابع لصبحة ام صدام , وأنت ما ادري من يا حزب وممول من دولة أجنبية , ونظل حايرين ما ندري شنسوي ؟

*  سبب الوفاة : الاصابة بفايروس " كورونا " بالقوة !

يكولون والعهدة على الكايل , ولو احنه نخاف من شغلة الاستشهاد بال" يكولون" لأن يطلعلنه محامي مثل اللي بمسرحية عادل امام " شاهد مشافش حاجة" وراح يصرخ بوجهي " الدليل قالولو " وطبعا راح يبليني , ويكول انت تفتري على الجهات الصحية , بس آني اكوله سمعت انه هناك عائلة راحت للمستشفى تستلم جثة أحد المتوفين لها , ومن استلموها قرأوا بورقة الوفاة السبب " إصابته بفايروس " كورونا " فهاي العائلة استغربوا , وكالوا يابه تره المتوفى كان بسبب جلطة , كاللهم الطبيب ليش صارت عنده جلطة , كالوله لأن ضاج وانقهر , كاللهم ليش انقهر , كالوله لأن صارت عليه ديون هواي , كاللهم ليش صارت عنده ديون , كالوله لأن شغله وكف خطيه , كاللهم ليش شغلة وكف خطية , كالوله بسبب كورونا , كاللهم لعد احنه شكتبنه سبب الوفاة ؟ هم هم ظلوا صافنين ما يعرفون شيكولون بعد !!

* نموذج للفساد

أبو سعد يكول اليوم قبضت الراتب واجتني أم سعد كالت أبو الأسواق يطلبنا 100 ألف انطيني أدزهن إله بيد سعد , انطيتها ال 100 ألف , العصر شفت سعد كلت له ها بابا وديت الفلوس لأبو الأسواق ؟ كال إي بابا وديتله 75 ألف !!, أم سعد دنكت وأني غلست ما ردت أحرجها , العصر طلعت أتمشى مريت من يم أبو الأسواق سلمت عليه كتله وصلن الفلوس ؟ ... كال إي رحم الله والديك سعد جابلي 50 ألف وشطبت كل الديون اللي عليكم !!! أبو سعد يكول من هاي اللحظة عرفت أن الفساد الاداري ضارب العراق من البتلو – للتيغه , الفساد منظومة تبأ بأم سعد ولا ينتهي عند أكبر مسؤول !!

* بلوة بلاد الرافدين  !

تعليقات وتحشيشات طريفة تتحدث عن العراق وزجه في صراعات لا ناقة له فيها ولا جمل , ما ندري يجوز مو ناقة وجمل يجوز اله بيهه عتوي , الله أعلم , المهم هاي التعليقات والتحشيشات صارت كثيرة , ومنها على سبيل المثال , أكو تعليق طريف يكول صاحبه : مصر تهدد أثيوبيا إن لم توقف سد النهضة فسوف تقصف سد الموصل , وواحد ثاني يكول إخوانه المصريين عركتكم ويه تركيا بالعراق لو عدكم مكان !!! وهكذا , وطبعا تاريخيا , أكو معارك وحروب معروفة صارت بالعراق وهو ما الهه علاقة بيهه , شنو هاي البلوة وليش

* مكرود!

طبعا البخت هسه هو الأساس , والبخت يرتبط بالحظ , وهسه الحظ متعلق بالظروف اللي نعيشها جميعا  , وهاي الظروف المعقدة الصعبة , أو كما يقول أحد الظرفاء "زلك" يعني نمشي بأرض بيها طين وكلساع نزلك ونريد نوكع أو بالحقيقة وكعنا , طبعا كل هذا الكلام سببه قلة بختنه بهذا البلد ,. لأن الناس يتظاهرون ويحتجون  , والمتعافين اللي يعتقدون بختهم وحظهم من السماء , قلقين من الوضع و شراح يصير , ودك اتفاقات ومشاريع ومؤتمرات يوم بجنيف ويوم بتركيا ويوم مدري وين , بالسر وبالعلن , شنو السالفة , احنه نكول محد يدري , بس هو الواقع كلنه ندري , بس نحجي ويه نفسنا , ومرات بصوت عالي ونكول جميعا : عيش ببخت موت ببخت مكرود يلمالك بخت , تتعب وتشكه علولف وتاليهه تكعد علتخت !!

 

المشـاهدات 1587   تاريخ الإضافـة 30/07/2020   رقم المحتوى 8355
أضف تقييـم